Дипломингиз ҳақиқийми, жаноб Жўраев?
Яқинда курсдошлар телеграммда гуруҳ ташкил қилиб, ўзаро алоқа қилиб турадиган бўлиб қолдик. Биров пойтахтда қолган, биров қишлоғига сурган. Қизларимизни гуруҳга қўшолмаймиз, рўзғори, бошида эри бор, ўзбекчилик дегандай.
Тўғрисини айтганда, бизнинг курсдошларнинг кўпининг иши юришмади. Сабоқдошларимиз орасида менга ўхшаб “райшолк”да бир амаллаб кун кечираётганлари ҳам бор, сал-пал иши юришганлари ҳам. Лекин Тўқимачилик ва енгил саноат институтида, боз устига институтнинг “Ипак технологияси” факультетида ўқиганимиздан афсусланмаймиз.
Ажойиб футбол командамиз, Тоҳир Баҳромович деган ипакдек мулойим деканимиз бор эди. Биз таҳсил олган 5-14 гуруҳларда жами 27 та бола бўлган. Уларнинг кўпчилиги ётоқхонада яшарди. Айримларигина ижара квартираларда, 2-3 нафар қиз тошкентлик бўлиб, улар уйидан қатнашган.
Юқорида айтганидай мамлакатимизнинг чекка туманларидан биридаги одмигина ипакчилик корхонасида ишлаб юрибман. Бировдан кам, бировдан ортиқ дегандай. Ҳозирча болалар кичкина, ташвишимиз катта эмас. Бироқ яқинда тасодифан интернет титкилаб ўтириб, ғайритабиий бир ҳолга гувоҳ бўлдим.
Бизнинг курсдошларимизнинг бири, яъни Тошкент Давлат Тўқимачилик ва енгил саноат институти “Ипак технологияси” факультетининг Бахтиёр Жўраев деган талабаси Хитой билан қўшма корхона ташкил қилибди. У кишининг ишлари беш, “Ташаббус-2017” республика кўрик танловининг ғолиби ҳам экан. Президентимизнинг қўлидан “Дўстлик” ордени ҳам олибди.
Фахрланиб кетдим. Бухородаги “Bukhara brilliant silk” корхонаси раҳбари экан. Мен ўқиган Тошкент Давлат Тўқимачилик ва енгил саноат институти “Ипак технологияси” факультетида таҳсил олган экан. Суриштирсам, айнан “группадошим” чиқиб қолса бўладими? Виниткага, эски расмлар йиғилган альбомга қарадим, йўқ. Эслай-эслай эсим кетди. Чунки бу кишимни нафақат мен, балки бошқа группадошларим ҳам кўрмаган эдик-да.
Курсдошим Латиф айтиб қолди: “Бу брат диплом ҳимоясига келганди, Бухородан сочи сийрак одам. Биз аввалига ўқитувчи бўлса керак, ёши катта экан дегандик эсингда бўлса…” Барибир эслай олмадим. Тадбиркор экан, ўша пайтда ҳам дипломини тадбиркорлик йўли билан олгандир-да. Ҳай, майли, буёни ҳуқуқни муҳофаза қилиш органларининг иши.
Мени қизиқтиргани президентимиз кунда кунора ойнаи жаҳондан нега ислоҳотларнинг кетмаётганини айтиб, сабабни кадрлардан қидиради. Ва ниҳоят, тўғри ечим, кадрларнинг ҳатто дипломи сохта бўлса улардан нима кутасиз? А, лаббай!
Ҳазрат Довқораев
dovqaraev@gmail.com