Ўзбекистон, коронавирус: Ҳали биринчи тўлқиннинг чўққисига ҳам чиқмадик — мутахассис

Коронавирусга қарши курашиш штаби аъзоси Ҳабибулла Оқилов Ўзбекистонда коронавирус пандемиясининг иккинчи тўлқини ҳали бошланмагани, балки биринчи тўлқини ҳали тугамаганини маълум қилган.

«Оилавий» телеканалида чиқиш қилган Оқилов мамлакатда пандемиянинг биринчи тўлқини тугаши тўғрисида ҳозирда гапиришга эрта эканини айтган.

«Аввал биринчи тўлқин тамом бўлиши керак. Охирги бемор тузалганидан озгина вақт ўтиб, яна бир бемор пайдо бўлса, буни иккинчи тўлқин, дейиш мумкин».

«Ҳозир биз биринчи тўлқиннинг чўққисига чиқиш даражасидамиз», қўшимча қилган у.

Сўнгги пайтда Ўзбекистонда инфекцияни юқтириб олганлар сони кун сайин ортиб бормоқда.

Мамлакатда қатъий карантин тартиби ўрнатилганига қарамай, кунора касалланганлар сони қайд этилиши бўйича рекорд янгиланиб бормоқда.

Мисол учун 27 июль куни бу борада янги рекорд қайди кузатилган – кун давомида коронавирус юқтириб олган 678 нафар янги бемор аниқланган.

Натижада, инфекция қайд этилганларнинг умумий сони 21,506 нафарга етган.

Ҳозирда 9,710 бемор шифохоналарда даволанаётгани маълум.

Шу вақтга қадар рўйхатга олинган ўлимлар сони 122 та.

«Одамлар коридорда ўлиб кетяпти»

Аввалроқ ўзи ва ота-онаси коронавирус юқтириб олгани ва ҳозирда даволанишда эканини маълум қилган таниқли қўшиқчи Муниса Ризаева Инстаграм орқали шифохоналардаги аянчли ҳолат ҳақида гапирган.

“Кўпчилик айтди: “Пулингиз бор, ота-онангизни болнитсага ётқиза олдингиз, ўзингиз ётибсиз”. Бугунги кунда пул ҳеч нарсани ҳал қилмаяпти”, деган қўшиқчи 26 июль куни жонли эфири давомида.

У аҳволи оғирлашган пайтда қанча жойга мурожаат қилмасин на ўзи, на ота-онасига керакли эътибор берилмаганини таъкидлаган.

“Муниса Ризаева бўласанми, министр бўласанми – ҳеч ким бир-бирини эшитмаяпти. Шифокорлар кам. Бир кунда минг-икки мингта одам кичкина болницага келяпти. Одамлар коридорда ўлиб кетяпти. Бу нарсаларни ўзим кўзим билан кўряпман”, иддао қилган у.

Олмалиқдан кислород

Олмалиқ кон металлургия комбинати коронавирус беморларини даволашда қўлланилувчи кислородни етказиб беришни йўлга қўйди.

Бу ҳақда комбинат ахборот хизмати маълум қилмоқда.

Хабарда комбинат шу пайтгача Республика шошилинч илмий-тиббий амалий маркази ҳамда Республика ихтисослашган илмий-амалий жарроҳлик марказига суюлтирилган кислород етказиб келгани айтилади.

«Ҳозирги кунда Республика вирусология илмий текшириш институти, Тошкент вилояти Зангиота туманидаги ихтисослаштирилган юқумли касалликлар шифохонаси, шунингдек, Тошкент шаҳри ва вилоятимизнинг тиббиёт муассасаларини суюлтирилган кислород билан таъминлаш бошланди. Айни вақтда комбинат кунига 35 тоннагача суюлтирилган кислородни етказиб бермоқда.», билдирган комбинат ахборот хизмати.